قصة حبيبين (قصتنا انتهت)

*********عتاب الشــــــــاب للفتــاة *********

بهاي عيوني شفتك لا تنكرين
وهذا الوجه ما يخفى عليّه
مو انا اللي شفتك.. لا تقولين ..
اميزك لو كنتي بين ميّه ..
صحيح وياك ، جايز تغلط العين
بس القلب شافك قال هيّه
اقولك وين شفتك اذا تريدين
بالمكان اللي كنا نقعد بيه سويّه
واقولك حتى انتي شكنتي تلبسين
من شفته عليك شصار بيّه
يُـبَـه.. نفس الثوب هذا اللي قبل شهرين
جبته بعيد ميلادك هديّه
وهاي الساعه بيدك ما تذكرين
جبتها بسبب تأخيرك عليّه
المحابس و التراجي و كحلة العين
نسيتي آنا جايبهن بايديّه..
قناني العطر كانت وحده و اثنين
او سويتك صدق اجمل بنيّه..
جبت لك كل شي حتى انتي تتحلين بيهن مو ليّـه
حصت غيري صاير تعب السنين
وانا بس المشترى صاير عليّه .. .. .. ..

********* جواب الفتــــــــــــــاة *********

صحيح انا اللي شفتها وانت مو غلطان
بنفس الثوب هذا اللي جبته ليّه
وصحيح انا كنت و يا شخص ثاني
وما انكر . اقولك آني هيّه
صدق كل اللي قلته
ما انكر .. صحيح جبتهن كلهن ليّه
بس آني اعطيتك قدهم اضعاف
حنان و لهفه و لوم الناس بيّه
كنت اشقد اجازف من اجي لك
واتحمل حكي امي عليّه
الاشياء اللي جبتها .. ألك انت البسهن انا وتتباها بيّه
جبتهن على ذوقك مو بذوقي لبستها لخاطرك ، ما تلوق ليّه
هداياك اللي قل لي وش تساوي
شو توازي شبابي أي هديه
انا اعطيتك عمر سلمته بيدك
بساعه و محبس .. تمِـن عليّه
وجاي اليوم اللي تعايرني بيهن
اظن عمرك ولا مقدم هديّه
وانا ما شفت منك أي نتيجه
وصارسنين اريدك تحس بيّـه
شفت العمر يجري وكل شي ماكو
قلت الحق بنفسي أنا اش بيه؟
من أظل وياك يتركني قطاري
بأخر لحظه صرت آني ذكيّه
جبت لك ما جبت لك هذا همك !!
لكن ترتبط ما إلك نيّه
اما الشخص هذا اللي كان وياي
اعتبره انا اجمل هديّه
من اول يوم عرفته
حسيته صادق .. إجانا لبيتنا و يطلب أيديّه
وقارنتك انت وياه مرات
شفت الـقـلـب يـمّــــك
لكن الحب حبيبي بهذا الزمن .. عشره بالميّه
والتسعين انا بحاجه إلهن
زواج واستقرار و أحلام ورديّه
لذلك قررت اختار غيرك
مو حقك تجي وتلوم بيّه
واذا انا قبلت قبل بهداياك
اسمح لي ارجعها الهديّه
ترا بخاتم الخطبه تزهي ايديّه .. .. .. ..
بس لو سمحتو كل واحد يقرئها ويقول الحق بئيد مين فيهم الشب او الفتاه

شكرا يا نور